နေပြည်တော် တပ်ကုန်းဂိတ်မှာ ကျခဲ့တဲ့ ဆရာဝန် တယောက်ရဲ့ မျက်ရည်

သူတပါးမျက်ရည် ကိုယ့်မျက်ဝန်းထဲမှာကျလာတဲ့အခါ (တိတ်တခိုးမျက်ရည်)

“မိန်းမ တော်တော်မောနေလားဟင်။ တော်တော်ကြာ ကားရောက်လာတော့မှာပါ။ အဲ့ကျရင်တော့ ဆေးရုံသွားလို့ရပြီလေ။” အနည်းငယ်တုန်ယင်နေပြီး အဆုံးသတ်ကျ အားလျော့စွာဖျော့တော့သွားသော ထိုစကားသံကို ကြားလိုက်ရချိန်တွင် ဖြတ်လျှောက်နေသောကျွန်တော့ခြေထောက်များ တုံ့ဆိုင်းသွားခဲ့သည်။

နေရာက နေပြည်တော်တပ်ကုန်းဂိတ်။ မိသားစုရှိရာ နေပြည်တော်သို့ ပြန်လာသည်မို့ ကွာရတင်းဝင်ရန် လာခေါ်မည့်ကားကို စောင့်ဆိုင်းနေသည့်အချိန်။ အထက်ပါစကားကို တိုးညင်းစွာကြားလိုက်ရခြင်းဖြစ်သည်။ အကျင့်ရနေသောမျက်လုံးက ဖျတ်ခနဲကြည့်လိုက်မိသည်နှင့် လူနာအခြေကို ကျွန်တော်သဘောပေါက်မိသွားသည်။ ဆံပင်တို့ပြောင်ရှင်းနေပြီး ပါးလျနေသောခန္ဓာ မဲညစ်ခြောက်သွေ့နေသော အသားအရေနှင့် ဝါကျင့်ကျင့်မျက်လုံးတို့က ကင်ဆာသမားတို့၏ လက္ခဏာဆိုသည်မှာ ယုံမှားဖွယ်မရှိချေ။

မတ်မတ်ထိုင်ချင်းငှါ မစွမ်းသာသည့်အလျောက် ခင်ပွန်းဖြစ်သူကိုအသာမှီထားပြီး လေကိုလုရှူနေသည့် သူမပုံကို မြင်ရသည်မှာ ပင်ပန်းဆင်းရဲလှသည်။ ရင်ဘတ်ကား ဖားဖိုတခုလို တရွှီရွှီတရှဲရှဲဖြင့် ပိန်လိုက်ဖောင်းလိုက် ဖြစ်နေလေ၏။ ဝေ့တက်လာသော မျက်ရည်တချို့ကို အမျိုးသမီးဖြစ်သူမမြင်အောင် အင်္ကျီပုခုံးစွန်းဖြင့် အသာသုတ်လိုက်သော်လည်း ကျွန်တော်ကားမြင်ဖြစ်အောင် မြင်မိသွားသည်။

ထိုအမျိုးသား ခဏထလာသောအခါ ကျွန်တော်မနေနိုင်တော့။ အနားကပ်ပြီး စကားပြောကြည့်သည်။ သူ့အပြောအရ ပြီးခဲ့သည့် ခြောက်လခန့်ကမှ ရင်သားကင်ဆာဖြစ်၍ နှစ်ဖက်စလုံး ဖြတ်ထုတ်ထားရကြောင်း၊ ကင်ဆာဌာနတွင် ဆေးသွင်းနေသည်မှာ ဆယ်ကြိမ်ရှိနေပြီဖြစ်ကြောင်းသိရသည်။

ကျွန်တော်ကဆရာဝန်ပါဟု မိတ်ဆက်တော့ သူအံ့ဩဝမ်းသာ သွားပုံရသည်။ အရင်ကရော အဲ့လိုပဲမောတတ်လားဟု မေးရာ “ပြီးခဲ့တဲ့လကမောတယ်ဆရာ။ အဲ့တာနဲ့ အဆုတ်ထဲက ရေတွေစုပ်ထုတ်လိုက်တာ နှစ်ပုလင်းခွဲတောင်ရတယ်။ အဲ့လိုထုတ်ပြီးတာနဲ့ သက်သာသွားရောဗျ” ဟု အားတက်သရော ပြောရှာသည်။ ယခုလဲ ဆေးရုံမြန်မြန်ရောက်၍ အရင်လို ရေစုပ်ထုတ်လိုက်လျှင် မြန်မြန်သက်သာသွားလိမ့်မည်ဟု သူမျှော်လင့်နေမှန်း ကျွန်တော်ရိပ်မိသည်။

ဓာတ်မှန်ရိုက်မထားဘူးလားဆိုတော့ “မစုပ်ခင်ရော စုပ်ပြီးရောရိုက်တယ်ဆရာ” ပြမယ် ဆိုပြီး ယူလာပြသည်။ အဆုတ်၏သုံးပုံနှစ်ပုံက ရေတွေဖြင့်ပြည့်နေပြီး ဖြူဖွေးနေပြီ။ ရင်သားမှ ကင်ဆာက အဆုတ်ကို ပြန့်သွားခြင်းဖြစ်န်ိုင်သည်။ အဆုတ်ထိ ကင်ဆာဆဲပြန့်နေပြီဆိုလျှင် အခြေအနေကား သိပ်မကောင်းလှ။

“ကလေးကသုံးယောက်ရှိတယ်ဆရာရဲ့။ နှစ်နှစ်ကလေး တယောက်၊ ခြောက်နှစ် တယောက်နဲ့ ဆယ့်သုံးနှစ် တယောက်ဆရာ။ တကယ်က ရက်ချိန်းက ကျော်နေတာက နှစ်ပတ်ရှိပြီ။ ပိုက်ဆံအဆင်မပြေတော့လဲ မလာနိုင်ဘူးဆရာရယ်။ ကျွန်တော်တစ်ယောက်ထဲရှာရတာ။ စားဖို့သောက်ဖို့ကလဲ ရှိသေးတယ်လေ။ အခုကို ဂိတ်မှာ ဒီအတိုင်းစောင့်နေရတာကို လေးနာရီလောက်ရှိနေပြီ။ သူကတော်တော်မောနေတာဆရာရဲ့။”

မတတ်သာသည့်အဆုံး အကြီးဆုံးသားကို နွားအငှါးကျောင်းခိုင်းရသည်ဟုပြောသည်။ ပြီးခဲ့သည့်တပတ်ကမှ စ မောလာရာ အခုတော့ ဘယ်လိုမှ နေလို့မရတော့သဖြင့် ပေါင်နှံချေးငှါးပြီး ထွက်လာခဲ့ရသည်ဟုပြောသည်။ “ဆေးကတလုံးကို နှစ်သိန်းခွဲဆရာရယ်။ အာခေါင်နှိုက်တာကလဲ တယောက်ငါးသောင်းဆိုတော့ အဲ့မှာတင်တသိန်းနေပြီ။ ပြီးတော့သုံးရက်လောက် Q ဝင်နေရတော့ စားစရိတ်ကလဲ မသေးဘူးခင်ဗျ”ဟုညှိုးငယ်စွာပြောရာ မဟုတ်သေးပါဘူးဟုကျွန်တော်တွေးမိပြီး ကင်ဆာဌာနမှ အစ်ကို ကိုရင်မောင်ဆီ ဖုန်းဆက်ကြည့်သည်။

အစ်ကိုမှ “ဟာ ဟုတ်ဘူးလေ။ လူနာဆို RDT နဲ့အမြန်စစ်ပေးတယ်။ Negative ဆို Q ဝင်စရာမလိုဘူး။ ပြီးတော့လူနာအတွက်အလကား။ လူနာစောင့်အတွက်က တသောင်းပဲ” ဟုပြောခဲ့ရာ ထိုအကြောင်းကို ကျွန်တော်ရှင်းပြ၍ သိသည်နှင့် တပြိုင်နက် ဝမ်းသာအားရဖြင့် “အဲ့တာဆို ကျွန်တော့မိန်းမကို ဆေးရုံမြန်မြန် ပို့နိုင်တော့မှာပေါ့နော်ဆရာ” ဟုပြောလဲပြော မျက်နှာလဲ မဲ့လာသဖြင့် ဟုတ်တယ်ဗျာဟုပြောပြီးအနားက အသာထွက်လာခဲ့လိုက်ရသည်။ စိတ်ကတော့လုံးဝမကောင်း။

ပြီးမှအိတ်ကပ်ကိုအသာစမ်းကြည့်လိုက်တော့ လာခါနီး လစာတသိန်းထုတ်လာခဲ့သည်ကိုအမှတ်ရမိသည်။ ကိုယ်Swab စစ်ဖို့က ငါးသောင်းဆိုတော့ စားဖို့သောက်ဖို့က အိမ်ကိုပဲပို့ခိုင်းလိုက်ပါမယ်လေဟုတွေးပြီး ကျန်သည့်ငါးသောင်းကို လက်ထဲထည့်လိုက်တော့ ခေါင်းတခါခါ လည်တခါခါဖြင့်ငြင်းသည်။ ဆေးဖိုးပါဟု မရမကပြောတော့မှ ကျေးဇူးစကားကို အထပ်ထပ်ပြောပြီး တုန်တုန်ရီရီဖြင့်ယူရှာသည်။

တကယ်ဆို သူတို့က ရမည်းသင်းက လာခြင်းဖြစ်သည်။ နေပြည်တော်နှင့်ဆို အနီးကလေး။ ခဏနှင့်ရောက်ရမည့်ကိစ္စကို မလိုအပ်ဘဲ ကြန့်ကြာပင်ပန်းနေရသည်။ မလိုအပ်ဘဲ မဲဆွယ် အောင်ပွဲခံ အပြင်ထွက် ပျော်ပါးခဲ့ကြသောသူများ ထိုကဲ့သို့သော လူနာများအပေါ် တွေးကြည့်စေချင်သည်။ ကိုယ်ချင်းစာကြည့်စေချင်သည်။ အဆင်အခြင်မဲ့သော မိမိလုပ်ရပ်တခုကြောင့် ဘဝပေါင်းများစွာ မိသားစုပေါင်းများစွာ ဒုက္ခပင်လယ်ဝေ မျက်ရည်ကျရသည့်အဖြစ်မျိုး ကြုံနေကြသည်ကို သိစေချင်သည်။ အတ္တများ လျှော့နိုင်သလောက်လျှော့ပြီး အချင်းချင်း မျှဝေကူညီကြလျှင်ဖြင့် ဤကမ္ဘာမြေသည် ပို၍နေချင့်စဖွယ် ဖြစ်လာပါလိမ့်မည်ဟု ကျွန်တော် ယူဆမိပါသည်။

ညီမ Pyae Phyo Htet Swe မှ လူနာအတွက် ဆေးဖိုး တသိန်းလှူဒါန်းသွားပါတယ်။ ဤကုသိုလ်ကြောင့် ကိုယ်ကျန်းမာ စိတ်ချမ်းသာရှိပြီး ဆထက်တပိုး လှူဒါန်းနိုင်ပါစေ။ လူနာရှင်ဖုန်းနံပါတ် – ၀၉၇၅၀၇၆၆၉၁၀

Zaw Ko Ko Kyaw

Leave a Reply

Your email address will not be published. Required fields are marked *

You cannot copy content of this page