သတ်မှတ်ထားတာနဲ့ မညီလို့ ခင်းထားတဲ့ ကွန်ကရစ်လမ်းကို ဘက်ဟိုးနဲ့ တူးပစ်တဲ့ မြိတ်စည်ပင်

သတ်မှတ်ထားတာနဲ့ မညီလို့ ခင်းထားတဲ့ ကွန်ကရစ်လမ်းကို ဘက်ဟိုးနဲ့ တူးပစ်တဲ့ မြိတ်စည်ပင်

မြိတ်မြို့၊ ရွှေပြည်တန် လမ်းမကြီးအား ကန်ထရိုက်က သတ်မှတ်စံနှုန်း အတိုင်း လမ်းမခင်းလို့ စည်ပင် သာယာရေးကော်မတီ က ပြန်လည်ဖြိုဖျက် ခဲ့ပါတယ်။

မြိတ်မြို့နယ်၊ မြိတ်တောင်ကျေးရွာ အုပ်စု၊ အင်းလေးမြိုင် ရပ်ကွက်ရှိ ရွှေပြည်တန် လမ်းမကြီး ကို ကွန်ကရစ်လမ်း ခင်းရာ မှာ တာဝန်ယူထား တဲ့ ကန်ထရိုက်က သတ်မှတ်ထားတဲ့ ပေအတိုင်း မခင်းပဲ ပေလျော့ခင်းထား လို့ မြိတ်မြို့နယ်စည်ပင်သာယာရေးကော်မတီ က စက်တင်ဘာ ၂၈ ရက်နေ့မှာ စတင်ဖြိုဖျက်ခဲ့တယ်လို့ သိရပါတယ်။

ကန်ထရိုက် က ကျနော်တို့ အမြဲတာဝန်ပေးနေတဲ့ အဖွဲ့ပါ ။ လမ်းကော်မတီတွေ၊ အရပ်သားတွေ ကလည်း ဒီရက်ပိုင်းမှာ ရာသီဥတုဆိုးရွားနေ လို့ ကြီးကြပ်မှုအပိုင်းမှာ အားနည်း မှုဖြစ်သွားတယ်။ ဒါကိုအခွင့်ကောင်းယူပြီး သတ်မှတ်ထားတဲ့ ၆ လက်မခင်းရမယ့် ကွန် ကရစ်ထုကို ၅ လက်မ၊ ၄ လက်မ စသဖြင့်ခင်းသွားတယ် ၊ ကျနော်ကိုယ်တိုင်သွားရောက်စစ်ဆေးတော့ တကယ်ပဲ ပေတွေလျော့ပြီး ခင်းထားတာတွေ့ရတယ်။ ဒါကြောင့် ဘက်ဟိုး နဲ့ ချက်ချင်းပြန်တူးပစ်လိုက်တယ်။ ကန်ထရိုက်ကိုလည်း သတ်မှတ်ထားတဲ့ ထုထည်အတိုင်း ပြန်ခင်းဖို့ ညွှန်ကြားခဲ့ပါတယ် လို့ မြိတ်မြို့နယ် စည်ပင်သာယာရေးကော်မတီ ဥက္ကဋ္ဌ ဦးမြတ်ကိုကိုက ပြောကြားခဲ့ပါတယ်။

ရွှေပြည်တန် လမ်းမကြီးကို အရှည်ပေ ၂၇၀၀ ၊ အနံ ၂၄ (စည်ပင် ၁၂ ပေ + ပြည်သူ ၁၂ ပေ) ထုထည် ၆ လက်မခင်းဖို့ စီစဉ်ထားသလို အစိုးရ နဲ့ ပြည်သူပူးပေါင်းဆောင်ရွက်နေတဲ့ လမ်းမကြီးတခုဖြစ်ကြောင်း သိရ ပါတယ်။ လက်ရှိ အနေထားအရ ပေ ၁၀၀၀ အထိ ခင်းထားပြီးဖြစ်ကာ စံနှုန်းမညီတဲ့ ကွန်ကရစ်လမ်းမှာ ပေ ၁၈၀ အထိတွေ့ရှိရလို့ စံနှုန်းမမီတဲ့ နေရာများကို ပြန်လည်းတူးဖော်နေကြာင်း သိရ ပါ တယ်။

စည်ပင်သာယာရေးကော်မတီ ရဲ့ ဆောင်ရွက်ချက် ကို လေးစား ပါတယ် ။ ဒီလို ပြတ်ပြတ် သားသားလုပ် မှ နောက်ပိုင်း ကန်ထရိုက်တွေလည်း နိုင်ငံတော်ရဲ့ဘတ်ဂျက်ကို အလွဲသုံးစား မလုပ်ရဲတော့မှာ၊ အခုရပ်ကွက်သားတွေကတော့ ဒီလိုဆောင်ရွက်ပေးတဲ့ အတွက် ကျေနပ် အားရသွားကြတယ်၊ လမ်းကော်မတီတွေအနေ နဲ့လည်း သေချာစောင့်ကြည့်သွားမယ်လို့ ပြောနေပါတယ်လို့ ရွှေပြည်တန်လမ်း တွင်နေထိုင်သူတဦးက ပြောပါတယ်။

အစိုးရသစ် တက်လာပြီး နောက်ပိုင်းမှာ ပြည်သူ နဲ့ အစိုးရပူးပေါင်းပြီး လမ်းအများအပြား ကို ကွန်ကရစ်ခင်းတာတွေ ဆောင်ရွက်နေကြောင်းသိရပါတယ်။

Leave a Reply

Your email address will not be published. Required fields are marked *

You cannot copy content of this page